طريقة عمل كحك العيد “هناء بشار”

المكوّنات
#1: عجينة الكحك :
3 كوب دقيق
كوب سمن ساخن
معلقة كبيرة سكر
معلقه كبيره خميره
معلقة صغيره ريحة كحك
معلقه صغيره فانيليا
معلقة كبيره سمسم محمص
رشة ملح
1/2 كوب لبن للعجن غالبا
للحشو ملبن او عجوه
#2: عجينة القراقيش و المنين :
كيلو دقيق
كوب و نص سمن ساخن
معلقة كبيره سكر
معلقة كبيره خميره
معلقة كبيره يانسون
معلقة كبيره لبن بودره
2 كوب لبن للعجن
رشه ملح
رشة فانيليا
للحشو عجوه
الخطوات
الطريقة واحده في الحالتين بتخلطي كل المكونات الجافه مع بعض وتقلبي كويس

تنزلي بالسمن واحده واحده واهم خطوه انك تبسي العجين مع السمن او تفركيه كويس جدا

تنزلي باللبن وتعجني لحد ما العجينه تلم معاكي تغطيها وتسيبيها ساعه تخمر

بعد ما تخمر تبداي تقرصي الكحك كور صغيره وتحشيه بالملبن وتشكليه بالمنقاش حسب ما تحبي

بالنسبه للمنين بتفردي العجينه وتفردي جواها العجوه وتلفيها رول وتقطعي بالسكينه

بالنسبه للقراقيش الساده بتلفيها رول بردو وتفردي حسب السمك المطلوب الافضل تكون رفيعه جدا وتقطعي

بعد كدا بتسخني الفرن كويس وتدخلي الصواني بالكتير ربع ساعه تاخد اللون المطلوب واما تبرد ممكن تزيني الكحك بسكر باودر حسب الرغبه والف هنا وكل عام وحضراتكم بالف خير