شعر : سـوزان بــدوي
سنة فاتت كانت حلوة
سنة أحلى هلت علينا
وقلوبنا غنت غنوة
عليت كادت أعادينا
مصر هتبقى أد الدنيا
بعملنا وصنعة أيادينا
هنعلِّي مآذن وكنايس
وعزولنا هيفضل حايس
وهنبنيها ونزرع فيها
ونعدي من مينا لمينا
وان طال الصبر ولا نهتم
عمر ما كان المم أهم
عز بلدنا بيقوينا
ياما أكلنا لقمة بدقة
لاجل ما تتحرر أراضينا
أو ناكل حتى العيش الحاف
لاجل ما تتحقق أمانينا
واللي سمع غير اللي شاف
إحنا المصريين
والشهامة طبع فينا
مش هيوقفنا الإحباط
ولا قيل أو قال هيخلينا
نغرق في بحور الأكاذيب
ولا نصدق سيل الإشاعات
ريح نفسك انت وهو
ولا تلعبش اللعبة دي علينا
بينا وبينك أكبر هوة
نرميك فيها لو تعادينا
ثرثر في الإعلام
أوعالسوشيال ميديا
اعمل جهدك تحبط فينا
مافيناش أبداً حد كروديا
واللي يتوه عقله يدله
يزيح الغمة ويرجع لينا
لما بصيرته تنور
ويشوف اللي اتبنى
واللي اتزرع واللي تطور
ولا احنا يا خلق نسينا
ياما تعبنا وياما آسينا
كنا ف جرة وطلعنا لبره
وعلى البر رسينا
والإرهاب بنحاربه
على كل حدودنا وداخل سينا
بنحارب وبنبني
وياما كافحنا وياما شقينا
وانت يا حبيبي يابني
مش أحسن ماللي حامينا
وبروحه و دمه بيفدينا
اخجل ولا تسخرش
احنا ما بنهزرش
طفي سيجارتك واسأل فينا
شيل الشيلة معانا
خلي ايديك في ايدينا
غير نفسك احسن ظنك
آمن صدق ما تخونش
وبعزيمتنا ما تستهونش
ربك دايماً بيقوينا
بسطنا الطرق وبنينا الحجر
قلت ده إيه ده
ليه أهملنا بناء البشر
واتفلسفت شوية علينا
بدأنا المشروع القومي
في التعليم والصحة
قلنا أكيد هتطير مالفرحة
خاب ظننا وكأننا
لا رحنا معاك ولا جينا
لساك على حالك قافل
وعن الحق دايماً غافل
وبتغلط في أعز ما فينا
رغم مخالفة ادعاءتك
بخراب هيحل علينا
للي حصل في العام الماضي
ونجحنا والكل راضي
والعالم بنجاحنا
بيقر ويشهد لينا
علشان كدهو هنغني
ونبشر حبايبنا
واصحابنا وأهالينا
سنة فاتت كانت حلوة
سنة أحلى هلت علينا
ومصر هتبقى أد الدنيا
بعملنا وصنعة أيادينا
