تكتبها :دكتوره ولاء شبانه
مستشار التربيه و طرق التدريس
صدقونى إنتوا اللى بأديكم تبنوا جيل من “الرجال” ..بمعنى الكلمة …وانتوا اللى بأديكم تطلعوا جيل متمايع .. الجنس ذكر فى البطاقه والفعل لا يحكى عنه…
ليه بقول للامهات ..لأنهم للأسف اللى بيدلعوا لحد ما ينقلب السحر على الساحر ..حتى لو الأب اعترض هى اللى بتقف فى طريقه وتقوله سيبه متشدش عليه ..حرام كده ..
مجتمعنا بيعانى أقسم بالله من قلة الرجوله وليس الذكوره…
الزوجات اللى بيصوتوا ليل نهار من أزواجهم بسبب انها شايله كل حاجه وهو مش عاوز يتحمل المسؤليه معاها لا فى تربية ولا تعليم ولا مشاوير ولا عارف عنها هى ولا ولادهم حاجه والحجه انه كفايه بيجيب فلوس وكتر خيره انه معيشها هى وولادها وبيصرف عليهم وكأنه بيعمل شئ مش واجب عليه …الأمثله دى كتيره جدا وفيه زوجات على شفا الانفجار..،
اللى بتصوتى منه بترجعى بمنتهى السذاجه تطبيقه مع ولادك…
ميشيلش طبقه..اصله يا حرام بيذاكر…
مينفعش يغسله …هيبهدل الدنيا..
يقلع هدومه ويرميها ف أى حته…مش مهم..
ميساعدش ف البيت..
انتى اللى عليكى السوبر ماركت والبقال والجزار والخضرى والمكوجى ..
إبنى يركب عربية أو تاكسى ميتبهدلش فى المواصلات..
لازم ياخد دروس فى كل المواد..مينفعش مجاميع…
أخته اللى تنضف عشان هو راجل ومينفعش يكنس ويمسح…
البواب اللى ياخد كيس الزباله…أصله يا حرام بيقرف..
العيش ميقدرش ينزل يجييه عشان قاعد بلبس البيت…
ازاى يروح المدرسه بالميكروباص أو مشى والجو حر …
هدومه انا اللى لازم أنقيهاله…
لازم وحتما ولابد يلبس كله ماركات ..صحابه يقولوا عليه إيه..
يحضر الفطار أو يسلق مكرونه..،ياعيب الشوم…
لو ذاكر لأخوه الصغير ممكن يتغابى عليه …
كل طلباته بمعنى كلها انتى اللى مسئوله عنها…
اللبس…غسيل..تطبيق ..مكواه…ولو فيه قميص او شورت فى الغسيل يبقى انتى اللى مسؤوله تغسليه وتنشريه وتكويه أو توديه للمكوجى..
الشرابات انتى اللى بتغسليها وتطبيقها وتحطيهاله فى دولابه ولو ضاع أى حاجه منها انتى المسئوله…
جزمته…كتبه….ادواته..انتى اللى عارفه مكانها…
دولابه بتوضبيه ويتبهدل بعدها بساعه وترجعى تعمليه..
مينفعش ياكل اى حاجه ع الماشى كده او بواقى عشان يا عينى يا حبيبى كان فى التمرين ولازم ياكل المحمر والمشمر …
فطرت يا حبيبى….أجيبلك تتسحر…تشرب كباية لبن دافيه…….وشك مخطوف يا ابنى اجيبلك معلقتين عسل….اعملك كباية شاى …يا نهار هتنام من غير ما تتعشى …
إبنك المراهق كبير كفايه على فكره انه يحدد اذا كان جعان ولا شبعان ..حران ولا بردان..
حلو انك تهتمى بيه وبحاجات هو بيحبها..،بس ميبقاش نمط الحياه اليومى كده..
إبنك المراهق مبقاش طفل لسه عنده سنه ولا اتنين …الطبيعى ان جسمه بيكبر وعقله كمان بيكبر ..مش طبيعى ابدا انه جسم راجل ومعاملة طفل رضيع ..
لسه القايمه طويله …جدا…
صدقونى فيه امهات كده ..وأكتر..،
الإسم بيربوا لكن الفعل حاجه تانية خالص..،
مش هى دى التربية يا جماعه…،
أرجوكى..أرجوكى…
علمى ابنك يعتمد على نفسه..يخدم نفسه..ويخدمك انتى وأبوه ..تساعديه ممكن ..توجهيه ياريت…لكن تفطسيه وتمحى شخصيته كراجل وفى الاخر ترجعى تشتكى ومراته تشتكى وتقولى ياريت اللى جرى ما كان ..
لو عاوز تعلم حد العوم ..إرميه ف الميه وخليه يحاول وخد بعدها بإيده ..بس الأول يحاول…
بحر الحياه مش بمبى على فكره …هيكبر ويتصدم بالواقع …
الحياه معترك ..مش بنقول انها غامقه ..بس هى زى حلبة السباق.،لازم إبنك يستعدلها كويس أوى..وبدايتها من عندك مش بعد ما يكون راجل وبشنبات نبدا نعلمه…
خليه ينضف…يكنس …يمسح…يشترى طلبات البيت…يتعلم يساعد نفسه واخواته .،،
يذاكر لوحده …ينط ف المواصلات …يقع ويقوم ..،يعافر ..يشتغل ..،الشغل مش عيب …
متخليش محور حياته كلها البيت والمذاكره والنادى ودمتم …
مش التعليم الانترناشيونال هو اللى هينفعه …
اللى هينفعه انه يفهم معنى الحياه صح..وعشان يفهمها صح لازم يعيشها بحلوها ومرها ..وده مش هيتعلمه فى المدرسه…
هيتعلمه معاكى إنتى وأبوه..بس انتوا سيبوله فرصه انه يجرب هيقع مره ويقف عشره…
بس بعدها هتستلمى راجل بمعنى الكلمه تقدرى تسلميه للحياه وتسلميه شريكه كمان لحياته وانتى مطمنه عليهم وهى كمان هتكون بتدعى لك …مش حاجه تانية لاسمح الله.
اتقوا الله في اولادكم
