جريدة بكره احلى الاخبارية رئيس مجلس الإدارة والتحرير وجدى وزيرى
-إيه صوت الصريخ ده؟
=لقوا
.
جثة واحد مقتول في الصحرا!
-مين اللي قتله؟
=محدش عارف لسة!
في يوم عيلة من اليهود لما صحيوا من النوم لقوا جثة شخص موجودة عند خيامهم!
لما دققوا النظر في ملامح الجثة دي عرفوا إنها جثة شخص يهودي ساكن في عيلة جنبهم.
معارف الشخص المقتول لما عرفوا بمقتله ووجود جثته عند العيلة التانية ، شكوا إن العيلة التانية هي اللي قتلته، وعشان كدة قرروا ياخدوا بتاره فجمعوا الأسلحة وراحولهم!
العيلة التانية لما لقت إن أهل المقتول رافعين عليهم سلاح، قرروا هما كمان يرفعوا سلاحهم عشان يدافعوا بيه عن نفسهم!
وفي لحظة ماخلاص هتبدأ الخناقة مابينهم، ظهر صوت لواحد صالح بيزعقلهم وبيقول:”هتتخانقوا مع بعض وتقتلوا بعض ونبي الله موسى عايش بنا، روحوا للنبي وهو أكيد هيحكم بينكم!”
وفعلًا القبلتين راحوا لسيدنا موسى، فابن أخو المقتول حكى لسيدنا موسى الحكاية كلها وطلب منه إنه يسأل ربنا من القاتل!
فسيدنا موسى قالهم :”إن الله يأمركم أن تذبحوا بقرة”
فاليهود بصوا للنبي بإستغراب وقالوله:” بتتريق علينا؟!
فسيدنا موسى قالهم:”أعوذُ بالله أن أكون من الجاهلين ”
فمشيوا وبما إن اليهود أهل جدال، رجعوا تاني للنبي
وقالوله:” أسأل ربك يوضحلنا سنها ”
فسيدنا موسى قالهم:” إنه يقول إنها بقرة لا فارض ولا بكر عوان بين ذلك”
(يعني ولا كبيرة عجوزة ولا صغيرة لسة متجوزتش قبل كدة)
فمشيوا ورجعوا لسيدنا موسى تالت مرة وقالوله:”اسأل ربك يوضحلنا شكلها ”
فسيدنا موسى قالهم:”إنه يقول إنها بقرة صفراء فاقع لونها تسر الناظرين”
(يعني لونها أصفر فاتح وأي حد بيشوفها جمالها بيلفت نظره)!
فمشيوا برضو وبعد شوية رجعوا رابع مرة وقالوله:”أسأل ربك يوضحهالنا أكتر، البقر اللي بنفس الصفات دي كتير ”
فسيدنا موسى قالهم:”إِنَّهُ يَقُولُ إِنَّهَا بَقَرَةٌ لَّا ذَلُولٌ تُثِيرُ الْأَرْضَ وَلَا تَسْقِي الْحَرْثَ مُسَلَّمَةٌ لَّا شِيَةَ فِيهَا ۚ ”
(يعني ما أتذللتش في غيط زرع ولا اتربطت في ساقية مية قبل كدة، ومافيهاش أي عيوب من مرض أو كسور أو أي حاجة، ولونها أصفر صافي خالي من البياض أو السواد ”
فقالوله:”تمام كدة لاقيناها ”
-طب اليهود لقوها فين؟
=لقوها في بيت طفل يتم فقير جدًا وماعندهوش الإ البقرة دي، وكان عايش مع أمه بعد موت أبوه، وأبوه قيل إنه قبل ما يموت خاف على إبنه من بعده فدعى الله وقال:”اللهم إني أستودعك هذة البقرة لولدي” ❤
فلما لقوها عنده طلبوا منه يشتروها بتمن ضعيف، ولكن أم الولد كانت بترفض، وهما يعلوا السعر وهي ترفض، وفضلوا يعلو ويعلو لحد ما عرضوا عليها في الأخر إنهم يشتروها منها مقابل وزنها دهب
يعني لو البقرة كانت ١٠٠كيلو فهما هيشتروها ب١٠٠كيلو دهب!
فوافقت وباعتهالهم.
فسبحان الذي لا تضيع ودائعه ❤
فلما دبحوها، الله أخبر سيدنا موسى بإنهم ياخدوا عضمة من عضم البقرة المدبوحة ويضربوا بيها جثة اليهودي المقتول!
فلما عملوا كده، فجأة لقوا الجثة بتتحرك واليهودي رجعتله الروح من تاني وقال بصوت ضعيف :”ابن أخي من قتلني وشاور عليه” ومات تاني.
وفعلًا ابن أخوه طلع هو اللي قتله لطمعه في إنه يورثه لإنه كان غني جدًا وابن اخوه هو وريثه الوحيد.
قال تعالى :”وَإِذْ قَتَلْتُمْ نَفْسًا فَادَّارَأْتُمْ فِيهَا ۖ وَاللَّهُ مُخْرِجٌ مَّا كُنتُمْ تَكْتُمُونَ * فَقُلْنَا اضْرِبُوهُ بِبَعْضِهَا ۚ كَذَٰلِكَ يُحْيِي اللَّهُ الْمَوْتَىٰ وَيُرِيكُمْ آيَاتِهِ لَعَلَّكُمْ تَعْقِلُونَ”
اذا قرأت لا ترحل قبل ما تصلي علي رسولنا الأمين
اللهم صل وسلم وبارك على سيدنا محمد وعلى آله وصحبه أجمعين
